صیہونی حکومت کو مقبوضہ بیت المقدس میں مجرمانہ اقدامات کی سنگین قیمت چکانی پڑے گی، حماس

مقبوضہ بیت المقدس : حماس نے بیت المقدس اور مسجد الاقصیٰ کے اندر صیہونی فوجیوں کے مجرمانہ اقدامات اور دراندازی کی شدید مذمت کرتے ہوئے صیہونی حکومت کو خبردار کیا ہے کہ اسے مقبوضہ بیت المقدس میں جارحانہ اور مجرمانہ اقدامات کی سنگین قیمت چکانی پڑے گی۔ حماس کے ایک سینیئر رہنما ہارون ناصر الدین نے ایک بیان میں کہا کہ صیہونی ٹولے کے ساتھ مسائل کا واحد حل مسلح قیام ہے اور اسکے علاوہ اس مجرم حکومت کے ساتھ کسی معاملے کو سرانجام تک نہیں پہنچایا جا سکتا۔مقبوضہ فلسطین کا چپہ چپہ فلسطینی باشندوں کا ہے اور وہاں سے ہر حال میں غاصب صیہونی فوجیوں اور بیگانہ آبادکاروں کو نکلنا ہوگا۔ انہوں نے واضح کیا کہ شیخ جراح کے معاملے پر صیہونی حکومت کے ساتھ کوئی سمجھوتہ نہیں ہوگا۔ نام نہاد صیہونی عدالتیں صیہونی حکومت کے سیکیورٹی اور انٹیلیجنس سسٹم کا حصہ ہیں اور ان کا کام بھی مقبوضہ علاقوں میں صیہونی حکومت کے غیر قانونی اقدامات کے لئے راہ ہموار کرنا ہے۔