صیہونی فوج نے غزہ سٹی میں کئی بلند عمارتیں ملیا میٹ کردیں، 67 فلسطینی شہید

غزہ : صیہونی فوج نے غزہ سٹی میں حملے جاری رکھتے ہوئے مزید کئی بلند عمارتیں ملیا میٹ کردیں۔ چوبیس گھنٹوں کے دوران کئے گئے حملوں میں خواتین اور بچوں سمیت مزید سڑسٹھ فلسطینی شہید ہوگئے۔ اسرائیلی فوج نے غزہ سٹی میں السوسی نام کی ایک بلند عمارت کو فضائی حملہ کرکے تباہ کردیا۔ اس سے پہلے صیہونی فوج نے تین عمارتوں کو ملیا میٹ کردیا تھا۔ صبح سویرے صیہونی فوج نے غزہ سٹی کے مختلف مقامات پر شدید گولہ باری اور فضائی حملے کئے جس میں کئی قیمتی جانیں ضائع ہوگئیں۔ رات گئے خان یونس میں خیموں پر کئے گئے حملے میں سات فلسطینی شہید کئے گئے۔ الصابرہ میں ایک اور حملے میں پانچ فلسطینی شہید ہوئے۔ الرمل میں بھی خیموں کونشانہ بنایا گیا۔
ادھر بھوک کی شدت سے مزید چھ افراد چل بسے۔ جس سے مرنے والوں کی تعداد 382 ہو گئی ہے جن میں 135 بچے بھی شامل ہیں۔