دنیا خاموش تماشائی، غزہ پر اسرائیلی حملوں میں نہتے خواتین و بچوں سمیت 250 فلسطینی شہید

غزہ : غزہ میں اسرائیل کی وحشیانہ بمباری کا سلسلہ جاری ہے۔ چوبیس گھنٹوں کے دوران مزید ڈھائی سو سے زائد فلسطینی شہید ہوگئے۔ صیہونی جنگی طیاروں نے صبح سویرے دیر البلاح میں شدید بمباری کی ہے۔ حملے میں رہائشی عمارتوں کو نشانہ بنایا گیا۔ بمباری سے چالیس افراد شہید اور کئی زخمی ہوگئے۔ جنگی طیاروں اور توپ خانے نے رات بھر خان یونس۔ جبالیہ ۔غزہ سٹی اور دوسرے مقامات پر شدید حملے کئے۔ کئی عمارتیں اور مکانات ملبے کا ڈھیر بن گئے۔ وسطیٰ غزہ میں تین منزلہ عمارت تباہ ہونے سے ایک ہی خاندان کے 76 افراد شہید ہوگئے۔
محکمہ شہری دفاع کے مطابق شہدا کا تعلق مراکشی خاندان سے ہے۔حماس نےحملوں میں پانچ اسرائیلی یرغمالی بھی مارے جانے کی تصدیق کی ہے۔ حماس کے ہاتھوں مزید چودہ اسرائیلی فوجی ہلاک ہوئے۔ زمینی جنگ سے ہلاک اسرائیلی فوجیوں کی آفیشل تعداد 153 ہوگئی ہے۔ جبکہ اصل تعداد اس سے کئی زیادہ ہے۔
حماس نے درجنوں اسرائیلی فوجی گاڑیاں، ٹینک اور بلڈوزر بھی تباہ کر دیے ہیں۔ ادھر صیہونی فوج کی دھمکیوں کے بعد وسطیٰ غزہ سے بڑے پیمانے پر انخلا شروع ہوگیا ہے۔ اور ہزاروں افراد پیدل۔ گدھا گاڑیوں اور دوسرے ذرائع سے دیر البلاح جارہے ہیں جہاں پہلے ہی لاکھوں افراد نے پناہ لے رکھی ہے۔