Raza Musani 
تہران : ایرانی صدر سید ابراہیم رئیسی نے امیر قطر سے ٹیلی فونک گفتگو میں پابندیوں کا خاتمہ کرانے کے لئے دوحہ مذاکرات سے متعلق ایران کے واضح موقف کا اعادہ کیا اور کہا کہ مذاکرات اسی صورت میں کامیاب ہوسکتے ہیں جب ایران مخالف ظالمانہ پابندیاں پوری طرح سے ختم کردی جائیں گی۔ انہوں نے کہا کہ آئی اے ای اے کی مصدقہ رپورٹوں کے باوجود ایران کے خلاف بے بنیاد دعوے اور الزامات اور ان کی باربار تکرار اس بات کو ثابت کرتی ہے کہ ایران کی خلاف تمام دعوے اور الزامات سیاسی محرکات کے حامل ہوتے ہیں جن کا مقصد مذاکرات کے موضوع کا رخ تبدیل کرنا ہوتا ہے۔ صدر مملکت نے کہا کہ ایک مستحکم سمجھوتے کے حصول کے لئے ضروری ہے کہ پابندیاں ختم کی جائیں اور ایران کے خلاف بے بنیاد دعؤوں اور الزامات کا سلسلہ بند کیا جائے اور اس سلسلے میں حقیقت پسندی کا مظاہرہ کیا جائے۔ صدر ابراہیم رئیسی نے معاہدے کی ممکنہ بحالی کے بارے میں جاری مذاکرات کے درمیان مغرب کے ایران کے خلاف مسلسل الزامات کو ترک کرنے سے انکار کی مذمت کی۔ اور کہا کہ مغرب سنجیدہ اور حقیقی مذاکرات کے تقاضوں کا پابند نہیں۔
