امریکا کا فلسطینی صدر کو جنگ بندی کی ڈیڈ لائن دینے سے انکار

رام اللہ : امریکی قومی سلامتی کے مشیر جیک سلیوان نے فلسطینی صدر محمود عباس سے ملاقات میں جنگ بندی کی ڈیڈ لائن دینے سے انکار کردیا۔
جیک سلیوان نے اسرائیلی حکام سے ملاقاتوں کے بعد فلسطینی صدر محمود سے رام اللہ میں ملاقات کی۔ فلسطینی صدر نے غزہ پر اسرائیلی حملے روکنے کی فوری ضرورت پر زور دیا اور غزہ میں تمام گزرگاہوں کو کھولنے کی ضرورت کا اعادہ کیا ہے تاکہ خوراک، امداد اور پانی کی فوری ترسیل کی اجازت دی جا سکے۔انہوں نے امریکہ پر بھی زور دیا کہ وہ مداخلت کرے اور اسرائیل پر مقبوضہ مغربی کنارے میں تشدد بند کرنے کے لیے دباؤ ڈالے۔ قومی سلامتی کے مشیر نے کہا کہ امریکہ اسرائیل پر زور دے رہا ہے کہ وہ وسیع پیمانے پر بمباری اور زمینی کارروائیوں کے بجائے جنگ کو حماس کے رہنماؤں کو نشانہ بنانے پر مرکوز رکھے، لیکن یہ واضح نہیں کیا کہ تبدیلی کب آئے۔