یمن جنگ کے طول پکڑنے کا ذمہ دار اقوام متحدہ ہے، سربراہ سپریم کونسل

صنعا: یمن کی سپریم سیاسی کونسل کے سربراہ مہدی المشاط نے یمن جنگ کے طول پکڑنے کا ذمہ دار اقوام متحدہ کوقرار دیا ہے۔انقلاب کی سالگرہ کے موقع پر خطاب میں انہوں نے انقلاب کو ایک دینی، قومی اور انسانی ضرورت قرار دیا۔ مہدی المشاط نے کہا کہ یمن کے سابق حکمران اپنا کھویا ہوا اقتدار واپس لینے کیلئے بیرونی ممالک پر بھروسہ کر رہے ہیں اور انہوں نے ملک کے خلاف اقتصادی محاصرہ اور جنگ شروع کر رکھی ہے ان غداروں نے کبھی بھی یمن اور یمنی عوام کے حق میں اچھا نہیں سوچا۔ انہوں نے کہا کہ 2014ء کے انقلاب کو آٹھ برس گزر چکے ہیں اور یمنی عوام اب بھی اپنے اس قیام، فداکاری اور فتح پر فخر محسوس کرتے ہیں۔ مہدی المشاط نے کہا کہ انقلابی عوام نے ملک کو ترقی کی راہ پر گامزن کیا ہے جس کا نتیجہ ایک مختلف اور ترقی یافتہ یمن کی صورت میں ظاہر ہو گا۔ انہوں نے کہا کہ 21 ستمبر 2014ء کا انقلاب کسی غیر ملکی طاقت کی مدد سے کامیاب نہیں ہوا تھا بلکہ اس کا انحصار مکمل طور پر یمنی عوام کی عوامی طاقت پر تھا۔ مہدی المشاط نے یمن کے خلاف جنگ میں مصروف جارح قوتوں سے مطالبہ کیا کہ وہ یمنی قوم سے دشمنی چھوڑ دیں اور امن اور صلح کی راہ اپنائیں۔ انہوں نے اقوام متحدہ، سلامتی کونسل اور عالمی برادری سے بھی حقیقی امن کی حمایت کرنے کا مطالبہ کیا۔