Raza Musani 
جدہ: اسلامی تعاون تنظیم نے صیہونی حکومت کی جانب سے مسجد الاقصی کی بار بار بے حرمتی کی مذمت کرتے ہوئے عالمی برادری سے اپنی ذمہ دایاں پوری کرنے پر زور دیا ہے۔ او آئی سی کے جنرل سیکرٹریٹ سے جاری بیان میں کہا گیا ہے کہ مسجد الاقصٰی پر حملہ اسرائیل کی جانب سے مقدس مقامات کے تقدس اور عبادت کی آزادی کی مسلسل خلاف ورزیوں میں توسیع اور جنیوا کنونشنز اور بین الاقوامی قانون کی کھلم کھلا خلاف ورزی ہے۔ بیان میں اسرائیل سے مقدس مقام کے خلاف ورزیوں کو بند کرنے اور القدس اوقاف انتظامیہ کے تقدس اور اختیار کو برقرار رکھنے کا مطالبہ کیا گیا ہے۔ بیان میں کہا گیا ہے کہ او آئی سی اسرائیل کی قابض حکومت کو ان جرائم اور منظم حملوں کے تسلسل کے نتائج کا مکمل طور پر ذمہ دار ٹھہراتی ہے جو خطے میں تشدد، تناؤ اور عدم استحکام کو ہوا دیتے ہیں۔ اور ساتھ ہی ساتھ بین الاقوامی برادری سے بھی مطالبہ کرتی ہے کہ وہ اسرائیل کو مقدس مقام پر اپنی خلاف ورزیاں بند کرنے پر مجبور کرنے کی ذمہ داریاں پوری کرنے کیلئے اقدامات اٹھائے۔ بیان میں مسجد اقصیٰ میں نمازیوں پر حملے اور گرفتاری اور مقبوضہ شہر الخلیل میں ابراہیمی مسجد کی بندش کی بھی سخت مذمت کی گئی ہے۔
