آئندہ کسی بھی امریکی جارحیت کا جواب کہیں زیادہ تباہ کن ہوگا، جنرل محمد پاکپور

تہران : پاسدارانِ انقلابِ اسلامی کے سربراہ میجر جنرل محمد پاکپور نے امریکا کو خبردار کیا ہے کہ آئندہ کسی بھی جارحیت کا جواب اس بار سے کہیں زیادہ تباہ کن ہوگا۔ جنرل پاکپور نے واضح کیا کہ قطر میں واقع امریکی اڈے "العدید ایئر بیس” پر ایرانی میزائل حملہ امریکی جارحیت کا جواب تھا، جسے "وعدۂ فتح” کے کوڈ نام سے انجام دیا گیا۔ ان کا کہنا تھا کہ امریکی سینٹرل کمانڈ کا یہ اسٹریٹجک مرکز جو مغربی ایشیا میں امریکا کا دل سمجھا جاتا ہے تہران کے حملے میں نشانہ بنا اور اسے واضح نقصان پہنچا۔
جنرل پاکپور نے امریکی صدر کو بیوقوف قرار دیتے ہوئے کہا کہ ٹرمپ نے صیہونی حکومت کو بچانے کے لیے امریکی عوام کی سلامتی اور مفادات داؤ پر لگا دیے۔ انہوں نے خبردار کیا کہ اگر امریکا نے ایران پر دوبارہ حملہ کیا تو اس بار ردعمل اتنا سخت ہوگا کہ واشنگٹن کو ہمیشہ کے لیے سبق مل جائے گا اور دنیا اسے یاد رکھے گی۔