Raza Musani 
اسلام آباد: پاکستان اور چین کے درمیان چوتھے اسٹریٹجک مذاکرات میں افغانستان کا مسئلہ سرفہرست رہا۔ پاکستان کے دارلحکومت اسلام آباد میں پاکستانی وزیرخارجہ بلاول بھٹو اور چینی ہم منصب چن گانگ کے درمیان مذاکرات ہوئے جس میں باہمی تعاون کے تمام کثیر الجہتی معاملات پر تبادلہ خیال کیا گیا۔ ملاقات کے بعد مشترکہ نیوز کانفرنس میں بلاول بھٹو نے کہا کہ افغانستان سے دہشت گردی ہمارے لیے ریڈ لائن ہے، افغانستان کے وسائل کو اس کے عوام کی بھلائی کیلئے استعمال کیا جانا چاہئے۔ ہم تینوں فریق سیکیورٹی تحفظات اور ان کے حل پر سہہ فریقی مذاکرات میں بات چیت کریں گے۔ چینی وزیر خارجہ کا کہنا تھا کہ افغانستان کی پاکستان کے ساتھ طویل سرحد ہے ۔ہم سمجھتے ہیں کہ پاکستان اور افغانستان بات چیت و مذاکرات کے ذریعے مسائل حل کر سکتے ہیں۔ امید ہے کہ طالبان ہمسایہ ممالک کی سلامتی کے تحفظات کو سنجیدہ لیں گے اور اقدامات کریں گے، اور طالبان شمولیتی حکومت بنائیں گے اور سب کو حقوق دیں گے۔ چین افغانستان اور پاکستان کے ساتھ سیکیورٹی و انسداد دہشت گردی تعاون بڑھانے کو تیار ہے تاکہ دہشت گرد گروپوں کے خلاف کارروائی کی جا سکے۔
