غزہ میں انسانی صورت حال تاریک اور خوفناک ہے، یونیسیف

غزہ: بچوں کی فلاح کیلئے کام کرنیوالے اقوام متحدہ کے ادارے یونیسیف نے غزہ میں انسانی صورت حال کو تاریک، خوفناک اور ناامیدی پر مبنی قرار دیا ہے۔یونیسیف کے ترجمان جیمز ایلڈر نے بتایا کہ بم اور میزائل محصور علاقے میں خوراک سے کہیں زیادہ مقدار میں داخل ہو رہے ہیں۔ فلسطینی خاندان بچوں کی ایک وقت کی خوراک کیلئے جدوجہد پر مجبور ہیں۔ انہوں نے کہا کہ وقتی طور پر پانی اور خوراک کی فراہمی میں معمولی بہتری آئی تھی لیکن تباہ کن ناکہ بندی نے امیدوں کو تیزی سے تحلیل کردیا۔
انہوں نے جنوبی غزہ میں حال ہی میں متعارف کرائے گئے امداد کی تقسیم کے نظام پر بھی تشویش کا اظہار کیا اور کہا کہ بچوں کو محض کھانےکا ایک ڈبہ جمع کرنے کی کوشش میں مارا جا رہا ہے۔ انہوں نے خبردار کیا کہ یہ نظام جان بوجھ کر شمالی غزہ سے لوگوں کو جنوب کی طرف دھکیلنے کے لیے ڈیزائن کیا گیا ہے۔