غزہ میں انسانی مشکلات اور مصائب ناقابل بیان ہو چکے ہیں، ریڈ کراس

غزہ: ریڈ کراس کی سربراہ مرجانا سپولجارک نے خبردار کیا ہے کہ غزہ میں انسانی مشکلات اور مصائب ناقابل بیان ہو چکے ہیں۔ انہوں نے یہ بیان غزہ پہنچنے کے بعد دیا۔ انہوں نے کہاکہ غزہ میں شہریوں کے لیے کوئی جگہ بھی محفوظ نہیں ہے۔ جاری فوجی محاصرے میں کوئی ایسا اقدام ممکن نہیں جسے ان مشکلات میں انسانی ردعمل کہا جا سکے۔انہوں نے کہا کہ فلسطینی علاقے میں شہریوں کو محفوظ بنانا انتہائی ضروری ہے۔ انہوں نے کہا کہ ان کے دورے کا مقصد انسانی پریشانی میں کمی کی کوششوں کو آگے بڑھانا ہے۔ میں اس پر اپنی گہری تشویش سے آگاہ کروں گی جو عام شہری یہاں انتہائی مشکلات برداشت کررہے ہیں۔ انہوں نے اسرائیلی یرغمالیوں تک ریڈ کریسنٹ کے ادارے کی رسائی کا مطالبہ بھی کیا اور کہا کہ یرغمالیوں کو ضرور رہائی ملنی چاہیے اور صلیب احمر کے نمائندوں کو پوری حفاظت کے ساتھ یرغمالیوں سےملنے کی اجازت ہونی چاہیے.