غزہ میں ہولناک نسل کشی کو فوری روکا جائے، پرینکا گاندھی

نئی دہلی : ہندوستان کی اپوزیشن جماعت کانگریس کی جنرل سیکریٹری پرینکا گاندھی نے غزہ میں قتل عام کو نسل کشی قرار دیتے ہوئے اسے فوری روکنے کا مطالبہ کیا ہے۔ سوشل میڈیا پلیٹ فارم ایکس پر اپنے پیغام میں پرینکا گاندھی نے کہاکہ اب عام شہریوں، ماؤں، ڈاکٹروں، نرسوں، امدادی کارکنوں، صحافیوں، اساتذہ اور ان ہزاروں معصوم بچوں کیلئے صرف آواز اٹھانا کافی نہیں ہے جن کا دن بدن صفایا کیا جارہا ہے۔ غزہ میں ہولناک نسل کشی ہو رہی ہے۔ انہوں نے کہا کہ نفرت اور تشدد پر یقین نہ رکھنے والے اسرائیلیوں سمیت ہر صحیح سوچ کے حامل فرد اور حکومت کی اخلاقی ذمہ داری ہے کہ وہ اسرائیلی حکومت کے نسل کشی کے اقدامات کی مذمت کرے اور انہیں روکنے پر مجبور کرے۔ پرینکا گاندھی نے امریکی کانگریس میں صیہونی وزیراعظم کے کھڑے ہوکر استقبال پرسخت تنقید کرتے ہوئے کہا کہ یہ عمل ایسی دنیا میں ناقابل قبول ہے جو تہذیب اور اخلاقیات کا دعویٰ کرتی ہے۔ ان کا کہنا تھاکہ صیہونی وزیراعظم اسے بربریت اور تہذیب کے درمیان ٹکراؤ قرار دیتے ہیں وہ بالکل درست ہے ۔ سوائے اس کے کہ وہ اور اس کی حکومت وحشی ہے۔ پرینکا گاندھی نے کہا کہ یہ دیکھنا واقعی شرم کی بات ہے کہ اسرائیل کی بربریت کو مغربی دنیا کی بے دریغ حمایت حاصل ہے۔