استقامتی محاذ جب چاہے، اسرائیل کی ناک زمین پر رگڑ سکتا ہے، ولی امر المسلمین

تہراں : ولی امر المسلمین آیت اللہ العظمی سید علی خامنہ ای نےکہا ہے کہ فلسطینیوں کی حالیہ جنگ کے دوران جہاد اسلامی نے صیہونی سازش کو ناکام اور اسرائیل کے غرور کو خاک میں ملا دیا ہے۔جہاد اسلامی فلسطین کے سربراہ زیاد النخالہ کے نام جوابی خط میں ولی امر مسلمین نےکہا کہ آپ نے اپنی شجاعانہ استقامت کے ذریعے ،غاصب صیہونی حکومت کی فریب کارانہ پالیسی کو ناکام بنا دیا اور ثابت کردیا کہ استقامتی محاذ جب چاہے، اسرائیل کی ناک زمین پر رگڑ سکتا ہے۔ولی امر مسلمین نے زیاد النخالہ کو مخاطب کرتے ہوئے کہا کہ آپ نے غزہ، غرب اردن کی جدوجہد کو ایک دوسرے سے جوڑ کر صیہونی دشمن کے مقابلوں میں قومی جہاد کا جو نمونہ پیش کیا ہے وہ قابل تعریف ہے۔ آیت اللہ خامنہ ای نے فلسطینی تنظیموں اور گروہوں پر زور دیا ہے کہ وہ باہمی اتحاد و یکجہتی کو اسی طرح محفوظ رکھیں، کیونکہ صیہونی دشمن کمزور اور فلسطین کی استقامتی تحریک طاقتور ہوتی جا رہی ہے۔ آپ نےکہا کہ ہم اس جدوجہد میں ہمیشہ کی طرح آپ کے شانہ بشانہ کھڑے ہیں۔رہبر انقلاب اسلامی کے نام جہاد اسلامی فلسطین کے سربراہ زیاد النخالہ کے خط میں ایران کی حمایت کا شکریہ ادا کرتے ہوئے کہا گیا تھا کہ اگر آپ کی حمایت نہ ہوتی، تو صیہونی دشمن کے مقابلے میں حالیہ اور اس سے پہلے ملنے والی فتح ہمارے لیے غیر ممکن تھی۔