Raza Musani 
پاراچنار: اشیائے خوردونوش اور سامان رسد کا پہلا قافلہ پاراچنار پہنچ گیا۔ اشیائے خوردونوش پر مشتمل تقریباً 40 گاڑیوں کا قافلہ روانہ کیاگیا تھا۔ جس میں سے 30 گاڑیاں پاراچنار اور گردونواح کے علاقوں میں پہنچ گئیں۔ جبکہ پہلے کانوائے میں پاراچنار دس گاڑیاں پہنچی۔ گاڑیوں میں ضروریات زندگی کا سامان نہ ہونے کے برابر ہے۔
مقامی محصور افراد کے مطابق روزانہ کی بنیاد پر سو ٹرک اشیائے ضروریہ کی ضرورت ہے۔ گندم، فیول، میڈیسن اور دیگر اشیاء اولین ضرورتیں ہیں۔
یاد رہے کہ حکومتی مذاکرات کے نتیجے میں مندوری میں جاری شرپسندوں کے دھرنا مظاہرین نے قافلے کیلئے راستہ کھولا۔ مقامی رہنماؤں حاجی شریف، حبیب الرحمان و دیگر عمائدین نے ذاتی، قبائلی اور انسانی بنیادوں پر قافلے کے تحفظ کی ذمہ داری لی تھی۔ جرگہ مشران نے حکومت کے ساتھ کامیاب مذاکرات کے نتیجے میں قافلے کے مسافروں اور سامان کی حفاظت کی ضمانت لی۔
خیال رہے کہ ضلع کرم میں مرکزی شاہراہ کی بندش سے بنیادی سہولیات اور ادویات کی کمی سے عوام کو مشکلات کا سامنا ہے۔ ڈپٹی کمشنر کُرم اشفاق خان نے پاراچنار سے ویڈیو بیان میں کہا کہ غذائی اشیا پر مشتمل گاڑیوں کا پہلا قافلہ پاراچنار پہنچ گیا اور قافلے کا امن سے پاراچنار پہنچنا بہت خوش آئند ہے۔ اشفاق خان نے عوام سے درخواست کی کہ قانون نافذ کرنے والے اداروں کے ساتھ تعاون کریں اور امن قائم رکھیں۔
