Raza Musani 
بیروت : حزب اللہ کے سربراہ شیخ نعیم قاسم نےکہا ہے کہ ہتھیار مقاومت کے وجود کا حصہ ہے جس کو چھیننے کا صیہونی خواب ادھورا ہی رہ جائے گا۔ حزب اللہ کے کمانڈر علی کرکی کی یاد میں ایک تقریب سے خطاب میں شیخ نعیم قاسم نے کہا ہے کہ یہ درست ہے کہ مزاحمت اسرائیل کی جنگ کو روکنے میں مکمل طور پر کامیاب نہ ہو سکی۔ لیکن اس نے دشمن کو سرحدی علاقے سے آگے بڑھنے سے روک دیا اور جنگ کو پھیلنے نہیں دیا۔ حزب اللہ نے پچھلے سترہ سال سے لبنان کی سلامتی اور استحکام کو برقرار رکھا ہے۔ شیخ قاسم نے انکشاف کیا کہ امریکا اور اسرائیل موجودہ جنگ بندی معاہدے کو اپنے مفادات کے خلاف سمجھتے ہیں اور اسی لیے وہ نیا معاہدہ مسلط کرنے کی کوشش کر رہے ہیں جس کا اصل مقصد پورے لبنان میں حزب اللہ کو غیر مسلح کرنا ہے۔ انہوں نے دو ٹوک انداز میں کہا کہ اسرائیل کبھی بھی ہمارے ہتھیار نہیں چھین سکتا۔ اگر وہ جارحیت کرے گا تو ہم پوری قوت سے دفاع کریں گے۔ جب تک ہم زندہ ہیں، اسرائیل اپنے مقاصد میں کبھی کامیاب نہیں ہوسکے گا۔
