Raza Musani 
بغداد : عراق کی شیعہ سیاسی جماعتوں کے اتحاد کے کوآرڈی نیشن کمیٹی نے پارلیمنٹ کی تحلیل کے بارے میں اپنے موقف کے اعلان کو عدالتی فیصلہ آنے تک موخر کردیا ہے۔ کمیٹی کے رکن علی الفتلاوی نے کہا ہے کہ ہم میانہ روی پر یقین رکھتے ہیں اور اس اتحاد کے بیشتر رہنماؤں کے بیانات سے اس بات کو بخوبی محسوس کیا جاسکتا ہے۔ الفتلاوی نے وزیراعظم مصطفی الکاظمی پر کڑی نکتہ چینی کرتے ہوئے کہا کہ جو شخص قاتل اور مقتول میں تمیز نہ کرسکے اسے ملک کی افواج کا کمانڈر انچیف ہونا زیب نہیں دیتا۔ ہمارے سامنے اصل مشکل یہ ہے کہ کس طرح سے عراقیوں کے درمیان خون خرابے کو روکا جائے۔ پارلیمنٹ کی تحلیل کے بارے میں عدالت کا فیصلہ آنے کے بعد ہی ہم اپنے موقف کا اعلان کریں گے۔دوسری جانب نیشنل وزڈم پارٹی کے سربراہ سید عمار حکیم نے ملک میں ایک مضبوط اور منصف حکومت کے قیام کا مطالبہ کیا ہے۔ سید عمار حکیم کے دفتر سے جاری بیان میں پچھلے چند روز کے واقعات پر افسوس کا اظہار کرتے ہوئے کہا گیا ہے کہ ملک میں فوری طور پر ایک طاقتور اور انصاف پسند حکومت کا قیام ضروری ہوگیا ہے۔ پہلے دن سے ہمارا یہی موقف تھا اور ہم آج بھی اس پر قائم ہیں کہ ملک کو ایسی طاقتور اور منصف حکومت کی ضرورت ہے جس کا سرچشمہ ہمارے ایمان اور عقیدے کی گہرائی سے پھوٹتا ہو۔
