افغانستان سے انخلاء کا فیصلہ مشکل لیکن درست تھا، امریکا

واشنگٹن: امریکا نے افغانستان سے فوجی انخلا کو درست قرار دیتے ہوئے کہا ہے کہ خواتین کو تحفظ ملنے تک طالبان کے ساتھ تعلقات معمول پر نہیں آسکتے۔ طالبان حکومت کے قیام کے دو سال مکمل ہونے پر نیوز بریفنگ میں امریکی وزیر خارجہ انٹونی بلنکن نےکہاکہ افغانستان سے انخلاء کا فیصلہ ناقابل یقین حد تک مشکل لیکن درست تھا۔ انہوں نے کہا کہ ہم افغان عوام کی حمایت کے لیے کام جاری رکھے ہوئے ہیں، جب بھی افغانستان کی بات آتی ہے تو ہمارے پاس کچھ دیرپا وعدے ہیں۔ وہ نہیں بدلے ہیں۔ انہوں نے کہاکہ افغان طالبان نے وعدے کئے مگر پورے نہیں کئے۔ امریکا طالبان کو ان کے وعدوں کے لیے جوابدہ ٹھہرانے کے لیے کام جاری رکھے ہوئے ہے۔ انہوں نے کہا کہ جب تک خواتین کو تحفظ نہیں دیا جائے گا طالبان کے ساتھ تعلقات معمول پر نہیں آسکیں گے۔