غاصب اسرائیلی فوج کی بربریت جاری، غزہ پر حملہ، 2 فلسطینی شہید، متعدد زخمی

نابلوس : صیہونی فوج کی فائرنگ سے مزید دو فلسطینی شہید ہوگئے جبکہ غزہ پر فضائی حملے میں کئی فلسطینی زخمی ہوئے۔صیہونی فوج نے مقبوضہ مغربی کنارے کے شہر طولکرم میں نور شمس کیمپ پر چڑھائی کردی۔ بلڈوزروں کیساتھ فوجیوں کی بھاری نفری رات گئے کیمپ میں گھس گئی اور کیمپ کے اندر مرکزی سڑک اور انفراسٹرکچر کو تباہ کرنے کا آغاز کیا جبکہ اسنائپرز نے شہریوں کے گھروں کی چھتوں پر قبضہ کر لیا۔ اندھا دھند فائرنگ سے 32 سالہ عبدالرحمن سلیمان اور 21 سالہ اسد جباوی شہید ہوگئے۔ اس سے پہلے صیہونی فوج نے ڈرون سے غزہ میں ایک ہدف پر فضائی حملہ کیا۔ حملے میں کسی جانی نقصان کی اطلاع نہیں ملی تاہم علاقے میں انفراسٹرکچر کو کافی نقصان پہنچا۔ دوسری جانب غزہ اور اسرائیل کے درمیان سرحد پر جھڑپوں میں تین فلسطینی زخمی ہوگئے۔ صیہونی فوجیوں نے براہ راست گولیاں برسائیں اور فلسطینی نوجوانوں نے اسرائیلی فورسز پر پتھراؤ اور دیسی ساختہ بم پھینکے۔