اسرائیل اور عرب ممالک کا معاہدہ ناکام ہوجائے گا، ایرانی صدر

نیویارک : ایرانی صدر ابراہیم رئیسی نے کہا ہے کہ امریکی سرپرستی میں خلیجی ریاستوں بشمول سعودی عرب سے اسرائیل کے تعلقات قائم کرانے کی کوششیں ناکام ہوں گی۔ امریکی ٹی وی سی این این کو ایک انٹرویو میں ایرانی صدر ابراہیم رئیسی نے کہا کہ عرب ممالک اور صیہونی حکومت کے درمیان معاہدہ ناکام ہوجائے گا۔ ان کا کہنا تھاکہ ایران نے یہ نہیں کہا کہ ہم اقوام متحدہ کے جوہری نگران ادارے کے جوہری معائنہ کار نہیں چاہتے۔ ایران کو اپنے جوہری مقامات کے معائنے سے کوئی مسئلہ نہیں ہے۔ انہوں نے کہا کہ ہم نے معائنہ کاروں کو نہیں روکا بلکہ معاہدے کی پاسداری نہ کرنے والے جرمنی، فرانس اور برطانیہ کے انسپکٹرز کو روکا ہے کیونکہ ہمیں ان ممالک کے نمائندوں پر کچھ تحفظات ہیں۔ ان کا کہنا تھا کہ ہم ابتدا میں 60 فیصد افزودگی نہیں کررہے تھے لیکن یورپین ممالک اپنے وعدے سے مکر گئے، اس پر اسلامی جمہوریہ ایران نے جو کچھ کیا، وہ 2015 کے جوہری معاہدے کو توڑنے کے جواب میں ایک ردعمل ہے۔ ابراہیم رئیسی نے کہا کہ ہم نے بار بار اعلان کیا ہے کہ جوہری ہتھیاروں کے استعمال کی کوئی جگہ نہیں ہے کیونکہ ہم اس پر یقین نہیں رکھتے اور نہ ہی ہمیں اس کی ضرورت ہے۔