غزہ کیلئے انتظامی کمیٹی نے قاہرہ سے باقاعدہ کام شروع کردیا

قاہرہ : غزہ کیلئے قائم انتظامی کمیٹی نے ڈاکٹر علی شعث کی سربراہی میں قاہرہ سے کام کا آغاز کردیا ہے اور کمیٹی کے ممبران کو باقاعدہ ذمہ داریاں سونپ دی گئی ہیں۔
انتظامی کمیٹی کے ارکان کے تقرر کے بعد مصر کے دارالحکومت قاہرہ میں پہلا باضابطہ اجلاس ہوا۔ اجلاس کے دوران شہری امور اور اندرونی سکیورٹی کی ذمہ داریاں کمیٹی کے ارکان کو سونپ دی گئیں۔ غزہ کے استحکام، بحالی اور تعمیر نو کی نگرانی کمیٹی کے سپرد کی گئی ہے۔ یہ انتظام اس وقت تک جاری رہے گا جب تک فلسطینی اتھارٹی اپنے اصلاحاتی پروگرام کی تکمیل نہیں کرلیتی۔
افتتاحی اجلاس کے بعد جاری بیان میں ڈاکٹر علی شعث نے قومی کمیٹی کے قیام کو ایک فیصلہ کن لمحہ قرار دیتے ہوئے کہا کہ یہ ایک المناک دور کے خاتمے اور ایک نئے باب کے آغاز کی علامت ہے۔ انہوں نے واضح کیا کہ کمیٹی کو فلسطینی لبریشن آرگنائزیشن، فلسطینی اتھارٹی اور حماس سمیت مختلف مزاحمتی گروپوں کی حمایت حاصل ہے۔