شاہ محمود قریشی کی ایرانی صدر ابراہیم رئیسی سے ملاقات، افغانستان سمیت مختلف باہمی امور اور دوطرفہ تعلقات پر تبادلہ خیال

تہران: پاکستان کے وزیر خارجہ شاہ محمود قریشی نے ایران کے صدر سید ابراہیم رئیسی سے ملاقات کی، جس میں مختلف امور پر تبادلہ خیال کیا گیا۔ اس موقع پر ایران کے صدر سید ابراہیم رئیسی نے کہا کہ تہران اسلام آباد کے ساتھ اقتصادی و سیکیورٹی تعاون کے سلسلے میں کسی محدودیت کا قائل نہیں ہے اور دونوں ممالک کے مابین اقتصادی و سیکیورٹی وفود کا تبادلہ اس مقصد کے حصول میں معاون ثابت ہو سکتا ہے۔ انہوں نے افغانستان کی صورتحال کا ذکر کرتے ہوئے کہا کہ افغام عوام کی مشکلات کو لے کر ایران بڑا فکر مند ہے اور ہم افغانستان کے عوام کی سیکیورٹی اور انکے امن چین کے بارے میں مسلسل غور کر رہے ہیں اور پاکستان اس سلسلے میں کافی مدد کر سکتا ہے۔ سید ابراہیم رئیسی نے مزید کہا کہ افغانستان میں داعش کی دہشتگردی اور وہاں پیش آنے والی مشکلات کا ذمہ دار ہم امریکہ کو سمجھتے ہیں کیوں کہ یہ ٹولہ خود امریکیوں کی ایجاد ہے۔
اس موقع پر پاکستان کے وزیر خارجہ شام محمود قریشی نے بھی ایرانی صدر کو افغانستان میں استحکام کے لیے پاکستان کی کوششوں سے آگاہ کیا۔ شاہ محمود قریشی نے کہا کہ اس وقت افغانستان کو لازمی امداد کی ضرورت ہے اور یہ امداد عالمی برادری بالخصوص پڑوسی ممالک کی جانب سے انجام پانی چاہیئے۔