بنوں میں فوجی قافلے پر خود کش حملہ، 9 جوان شہید، 5 زخمی

بنوں: خیبر پختونخوا میں فوجی قافلے پر خودکش حملے میں 9 جوان شہید اور پانچ زخمی ہوگئے۔ بنوں شہر کے علاقے جانی خیل میں موٹر سائیکل سوار خود کش حملہ آور فوجی قافلے کے قریب آکر پھٹ گیا۔ زوردار دھماکے سے فوجی گاڑی کو شدید نقصان پہنچا اور نو فوجی جاں بحق اور پانچ زخمی ہوگئے۔ جنہیں فوجی اسپتال منتقل کردیا گیا۔ خودکش حملے کے بعد فوج نے علاقے کو گھیرے میں لے کر دہشت گردوں کی تلاش کیلیے آپریشن شروع کردیا۔ پاک فوج کے ترجمان کا کہنا ہے کہ سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔ نگراں وزیراعظم انوار الحق کاکڑ نے بھی دہشت گردانہ حملے پر افسوس کا اظہار کیا ہے۔