Raza Musani 
کراچی : گلوبل صمود فلوٹیلا پر اسرائیلی حملے کا شدید عالمی ردعمل سامنے آیا ہے۔ کولمبیا نے اسرائیلی سفارتکاروں کو فوری ملک بدر کردیا۔ آئرش صدر مائیکل ہگنز نے کہا ہے کہ اسرائیل کا فلوٹیلا پر حملہ دنیا کے لیے خطرے کی گھنٹی ہے اور امدادی کارکنوں کی سلامتی سب قوموں کا مشترکہ فریضہ ہے۔
اسپین کے وزیرِ اعظم نے کہا ہے کہ وہ شہریوں کے تحفظ کے لیے ہر ممکن قدم اٹھائیں گے۔ بولیویا کے صدر لوئیس آرسی نے فلوٹیلا پر حملے کو بین الاقوامی قانون کی کھلی خلاف ورزی قرار دیتے ہوئے عالمی برادری سے اس کے خلاف اٹھ کھڑے ہونے کی اپیل کی ہے۔ کولمبیا کے صدر گستاوو پیٹرو نے کہا کہ اسرائیل نے ایک نیا بین الاقوامی جرم کیا ہے۔
ایرانی وزارت خارجہ کے ترجمان نے کہا کہ اسرائیلی جارحیت دہشت گردی اور بین الاقوامی قانون کی صریح خلاف ورزی ہے۔ ترک صدر رجب طیب اردوان نے کہا کہ فلوٹیلا پر حملہ ایک ڈکیتی ہے اور اس نے غزہ کی بقا کی جدوجہد کی سنگینی کو دنیا کے سامنے واضح کر دیا ہے۔ قطر نے تمام گرفتار شدگان کو فوری رہا کرنے کی اپیل کی ہے۔
