Raza Musani 
تل ابیب : اسرائیلی فوج نے امدادی جہاز میڈیلین سے حراست میں لئے گئے ماحولیاتی کارکن گریٹا تھنبرگ سمیت بارہ افراد کو ان کے ملکوں کو واپس بھیجنے کے اقدامات شروع کردئے ہیں۔ صیہونی حکام نے گذشتہ روز قبضے میں لئے گئے امدادی جہاز کو رات گئے اسرائیلی بندرگاہ اشدود منتقل کیا۔ جہاز پر سوار گریٹا تھنبرگ سمیت تمام افراد کو پوچھ گچھ کے عمل سے گذارا گیا اور پھر تل ابیب کے بین گورئن ائرپورٹ پہنچایا گیا۔ جہاں ملک بدری کے کاغذات پر دستخط کے بعد انہیں ان کے ملکوں کو روانہ کیا جائے گا۔ یورپی پارلیمنٹ کی فرانسیسی رکن ریما حسن سمیت بعض ارکان نے دستخط سے انکار کردیاہے۔
صیہونی فوج نے گذشتہ روز غزہ سے سو کلومیٹر دور فریڈم فلوٹیلا پر حملہ کرکے اس پر قبضہ کرلیا تھا اور تمام افراد کو حراست میں لے لیا تھا۔
