Raza Musani 
نیویارک: اقوام متحدہ کی انسانی حقوق کونسل کے ماہرین نے بارہ سالہ بچوں کو عمر قید کی سزا دینے کے قانون پر شدید تشویش کا اظہار کیا ہے۔ اقوام متحدہ کے ماہرین نے سوشل میڈیا پر جاری بیان میں کہا ہے کہ اسرائیل کے دو نئے انسدادِ دہشت گردی قوانین انسانی حقوق کی سنگین خلاف ورزی ہیں۔
ان میں ایک قانون کے تحت بارہ سالہ بچوں کو عمر قید دی جاسکتی ہے جبکہ دوسرے قانون کے تحت بچوں کی فلاح و بہبود کے لیے دی جانے والی امداد کو معطل کیا جاسکتا ہے۔ ماہرین نے کہا کہ یہ قانون بچوں کے حقوق سے متعلق اقوام متحدہ کے کنونشن کی خلاف ورزی ہیں، اسرائیل نے اس کنونشن کو اکتوبر 1991 میں تسلیم کیا تھا۔ اقوام متحدہ کے ماہرین نے نشاندہی کی کہ مغربی کنارے میں اسرائیلی فوجی قوانین پہلے ہی 12 سالہ فلسطینی بچوں کو جیل بھیجنے کی اجازت دیتے ہیں۔ ماہرین نے اس اقدام کو انسانی حقوق، خاص طور پر فلسطینی بچوں کے حقوق کی شدید خلاف ورزی قرار دیا۔
