امریکا میں مسلم اداروں اور عبادت گاہوں کی سیکیورٹی فنڈنگ بند

واشنگٹن : امریکہ میں دہشت گردی سے تعلق جوڑ کر مسلم تنظیموں اور عبادت گاہوں کی فیڈرل ایمرجنسی مینجمنٹ ایجنسی (فیما) گرانٹس بند کردی گئی ہے۔ سی این این کی رپورٹ کے مطابق مسلم اداروں کی فنڈنگ روکنے کا فیصلہ امریکی محکمہ ہوم لینڈ سیکیورٹی اور محکمہ گورنمنٹ ایفیشنسی کی جانب سے کیا گیا ہے۔
یہ گرانٹس عام طور پر مذہبی، قبائلی اور غیر منافع بخش اداروں کو نفرت انگیز حملوں سے تحفظ کے لیے دی جاتی ہیں، جن کے ذریعے سکیورٹی گارڈز، نگرانی کے نظام اور دیگر حفاظتی اقدامات کو بہتر بنایا جاتا ہے۔ ٹرمپ انتظامیہ کے فیصلے سے مسلم اداروں اور مساجد کو نفرت انگیز جرائم اور حملوں کے خطرات لاحق ہو گئے ہیں۔
امریکن اسلامک ریلیشنز کونسل نے اس فیصلے کو آئینی اور اخلاقی طور پر غلط قرار دیا ہے۔ تنظیم کے قومی ڈپٹی ڈائریکٹر ایڈورڈ احمد مچل نے کہا کہ کسی بھی امریکی مسلم تنظیم کو اس کے عقیدے یا سیاسی بنیاد پر سکیورٹی فنڈ سے محروم کرنا غیر آئینی اور امتیازی سلوک ہے۔