Raza Musani 
نیویارک : غزہ جنگ بندی کی قرارداد ویٹو کرنے پر چین اور روس سمیت سلامتی کونسل کے تمام ارکان نے امریکا کیخلاف شدید برہمی کا اظہار کیا ہے۔ فرانس اور برطانیہ کے سفیروں نے ووٹنگ کے نتائج پر افسوس کا اظہار کیا۔
چینی سفیر فو کونگ نے امریکا کو اس صورت حال کا ذمہ دار ٹھہراتے ہوئے اسے سیاسی مفادات سے دست بردار ہو کرمنصفانہ اور ذمہ دارانہ موقف اختیار کرنےکی دعوت دی۔
الجزائر کے سفیرعمار بن جامع نے کہا کہ خاموشی نہ مُردوں کا دفاع کرتی ہے، نہ مرتے ہوؤں کا ہاتھ تھامتی ہے۔
ادھر فلسطینی سفیر ریاض منصور نے افسوس کا اظہار کرتے ہوئے کہا کہ وہ اب جنرل اسمبلی کی طرف جائیں گے۔
اس سے پہلے سلامتی کونسل میں قرارداد کے حق میں چودہ ممالک نے ووٹ دیا جبکہ امریکا نے اکیلے اس کی مخالفت کی۔ امریکا کی قائم مقام سفیر ڈوروتھی شیا نےکہا کہ امریکا کسی ایسی قرارداد کی حمایت نہیں کر سکتا جو حماس کی مذمت نہ کرے اور اس کے غیر مسلح ہو کر غزہ سے انخلاء کا مطالبہ نہ کرے۔
