انتہائی مطلوب دہشتگردوں کی دوسری فہرست جاری، انعامی رقم مقرر

پشاور: محکمہ انسداد دہشت گردی (سی ٹی ڈی ) خیبر پختونخوا نے مطلوب دہشت گردوں کی دوسری فہرست جاری کردی۔ محکمہ انسداد دہشت گردی کے مطابق دہشت گردوں کی گرفتاری پر 3 لاکھ سے 50 لاکھ روپے تک کی انعامی رقم مقرر کی گئی ہے ۔ محکمۂ انسداد دہشت گردی کی جانب سے جاری کی گئی فہرست میں دہشت گردوں کے نام اور تصاویر شامل ہیں ، مطلوب دہشت گردوں میں 15 کا تعلق ضلع بنوں، 13 کا تعلق لکی مروت جبکہ دو کا تعلق ڈیرہ اسماعیل خان سے ہے۔ سی ٹی ڈی کے پی کی جاری فہرست کے مطابق لکی مروت سے تعلق رکھنے والے دہشت گرد حبیب اللہ کے سر کی قیمت 50 لاکھ مقرر کی گئی ہے جبکہ بنوں کے دہشت گرد کمانڈر مولوی نعمت اللہ کے سر کی قیمت 40 لاکھ مقرر کی گئی ہے۔
انتہائی مطلوب دہشت گردوں کی اطلاع دینے والے افراد کا نام پوشیدہ رکھا جائے گا۔
چند روز قبل محکمہ انسداد دہشتگردی (سی ٹی ڈی ) نے 135 انتہائی مطلوب دہشت گردوں کی فہرست جاری کی تھی۔