غزہ میں پابندیوں سے انسانی بحران سنگین ہو رہاہے، ڈاکٹر ٹیڈروس

جنیوا : عالمی ادارۂ صحت کے سربراہ ٹیڈروس ایڈہانوم گیبریاسس نے کہا ہے کہ غزہ میں امداد کی ترسیل اب بھی شدید پابندیوں کا شکار ہے، جس سے انسانی بحران مزید سنگین ہو رہا ہے۔ ڈاکٹر ٹیڈروس نے سوشل میڈیا پلیٹ فارم ایکس پر بتایا کہ عالمی ادارۂ صحت کو غزہ میں طبی امداد پہنچانے میں اسرائیل کی جانب سے مسلسل مشکلات کا سامنا ہے۔ ان کا کہنا تھا کہ لیبارٹری اور تشخیصی طبی آلات سمیت متعدد اشیا کو دُہرے استعمال کے بہانے داخلے کی اجازت نہیں دی جا رہی۔ ٹیڈروس کے مطابق یہ سامان سانس کی شدید بیماریوں میں مبتلا افراد کی بروقت تشخیص، ردعمل اور علاج کے لیے انتہائی ضروری ہے۔ انہوں نے زور دیا کہ انسانی بنیادوں پر امداد کی بلا رکاوٹ فراہمی ناگزیر ہے تاکہ غزہ میں صحت کا نظام مکمل طور پر تباہ ہونے سے بچایا جا سکے۔