عملی اقدامات سے گریزاں، عرب وزرائے خارجہ کا ایک اور اجلاس

ماسکو : عملی اقدامات سے گریزاں عرب وزرائے خارجہ جنگ بندی کیلئے بیجنگ کے بعد ماسکو پہنچ گئے۔ سعودی وزیر خارجہ شہزادہ فرحان کی زیر قیادت عرب وزرائے خارجہ نے روسی وزیر خارجہ سرگئی لاروف کے ساتھ اجلاس منعقد کیا جس میں غزہ کی صورتحال پر غور کیا گیا۔ روسی وزیر خارجہ سرگئی لاروف نے کہا کہ عالمی انسانی حقوق کے بنیادی قوانین سے متصادم دہشت گرد کارروائیوں کی مذمت کرتے ہیں۔ غزہ کے مسئلے کے حل کیلئے فوری جنگ بندی اور یرغمالیوں کی جلد رہائی ناگزیر ہے۔ سعودی وزیر خارجہ شہزادہ فیصل بن فرحان نے کہا کہ غزہ میں فوری جنگ بندی اور سنجیدہ امن مذاکرات پر عملدرآمد کیا جائے۔ اسرائیل کی بین الاقوامی قوانین کی خلاف ورزیاں انتہا پسندی بڑھا رہی ہیں، ہماری ترجیحات جنگ بندی کرا کر بےگناہ شہریوں کو تحفظ کی فراہمی اور انسانی سانحہ روکنا ہے۔ غزہ میں فوری جنگ بندی، محاصرے کا خاتمہ اور شہریوں کا تحفظ ہونا چاہیے۔