مسئلہ کشمیر حل کئے بغیر بھارت سے تعلقات استوار نہیں ہوسکتے، شہباز شریف

لندن: وزیراعظم شہباز شریف نے بھارت کی جانب اشارہ کرتے ہوئے کہا ہے کہ جنگ بندی ہو چکی ہے اب ہم امن، خوشحالی اور ترقی چاہتے ہیں۔ شہباز شریف نے لندن میں اوورسیز پاکستانیوں کی تقریب سے خطاب میں کہا کہ میں آپ کو 10 مئی کی فتح عظیم کی مبارکباد دینا چاہتا ہوں۔ اس وقت ہمارے خلاف جھوٹا الزام لگایا گیا۔ دس مئی کی فتح نے دشمن کو وہ سبق سیکھایا جسے وہ زندگی بھر یادرکھے گا۔
انہوں نے کہا کہ وقت آ گیا ہے کہ کشمیر اور فلسطین جیسے خطوں میں اب امن قائم ہونا چاہئے اور اسلامی دنیا کو آگے بڑھ کر امن کیلئے بات چیت کرنی چاہئے اوراپنا لوہا منوانا چاہئے اگر کوئی یہ سمجھتا ہے کہ کشمیر کے مسئلے کو حل کئے بغیر باہمی تعلقات استوار ہوسکتے ہیں تو وہ احمقوں کی جنت میں رہتا ہے۔ انہوں نے کہا کہ ہم کشمیر، تجارت اور انسداد دہشت گردی کے بارے میں مل بیٹھ کر بات کرنا چاہتے ہیں۔