Raza Musani 
ماسکو : پاکستان اور علاقائی طاقتوں نے افغانستان میں غیر ملکی فوجی اڈوں کے دوبارہ قیام کو مسترد کر دیا۔ افغانستان پر ماسکو فارمیٹ کا ساتواں اجلاس روس کے دارالحکومت ماسکو میں منعقد ہوا جس میں پاکستان، چین، روس، انڈیا، ایران، قازکستان، کرغستان، تاجکستان اور ازبکستان کے نمائندوں نے شرکت کی۔
افغانستان پہلی مرتبہ باقاعدہ رکن کی حیثیت سے شریک ہوا۔ اجلاس کے بعد جاری مشترکہ اعلامیے میں کہا گیا ہے کہ کسی بھی صورت میں افغانستان اور اس کے ہمسایہ ممالک میں غیر ملکی فوجوں کی موجودگی نہیں ہونی چاہیے۔ خطے کے استحکام کے لیے افغانستان کی خودمختاری اور سالمیت کا احترام کیا جائے۔ شرکا نے بیرونی مداخلت سے محفوظ آزاد، خود مختار، متحد، اور پر امن افغانستان کے لیے اپنی حمایت کا اعادہ کیا۔
اجلاس میں افغانستان سے بھی مطالبہ کیاگیا ہےکہ وہ اپنی سرزمین سے دہشت گردی کے خاتمے کےلیے جامع اقدامات کرے تاکہ اسے ہمسایہ ممالک کی سلامتی کے لیے خطرہ کے طور پر نہ استعمال کیا جائے۔
