غزہ میں قتل عام اور فاقہ کشی کیخلاف یورپ بھر میں ریلیاں

غزہ : غزہ کی ناکابندی اور اسرائیل کی نسل کشی پالیسی کے خلاف یورپی ممالک میں ہزاروں افراد نے ریلیاں نکالیں اور مظاہرے کئے۔
یہاں برطانیہ میں شہریوں نے لندن کی سڑکوں پر نکل کر اسرائیلی حملوں کے خلاف احتجاج کیا۔ مظاہرین نے رسل اسکوائر سے وزیر اعظم کے دفتر کی جانب مارچ کیا۔
سوئیڈن کے دارالحکومت اسٹاک ہوم میں بھی سینکڑوں افراد نے غزہ شہر پر قبضے کے اسرائیلی منصوبے کے خلاف احتجاج کیا۔ ایمسٹرڈیم میں بھی اسرائیلی منصوبے کیخلاف احتجاج کے لیے لوگ سڑکوں پر نکل آئے۔
اسپین کے دارالحکومت میڈرڈ سمیت مختلف شہروں میں فلسطینی حامیوں نے ریلیاں نکالیں۔ بارسلونا میں مظاہرین نے برتن بجاکر اپنا احتجاج ریکارڈ کرایا۔
جنیوا کے جارڈین انگلیس میں بھی لوگ جمع ہوئے اور علامتی دھرنا دیا۔ نیویارک میں انسانی حقوق کی تنظیموں نے اسرائیلی قونصل خانے کے سامنے اسرائیل کی فاقہ کشی پالیسی کیخلاف احتجاج کیا ۔