Raza Musani 
قطر۔ مصر اور اردن نے غزہ پر اسرائیلی حملوں کی شدید مذمت کرتے ہوئے اسے جنگ بندی کی کھلی خلاف ورزی قرار دیا ہے۔ قطری وزارتِ خارجہ نے کہا ہے کہ اسرائیلی کارروائیاں ایک خطرناک اشتعال ہیں جو حالات کو مزید بگاڑ سکتی ہیں۔ یہ حملے نہ صرف جنگ بندی بلکہ علاقائی اور عالمی امن کوششوں کو بھی نقصان پہنچا رہے ہیں۔ قطر نے خبردار کیا کہ اگر یہ خلاف ورزیاں نہ رکیں تو خطے میں کشیدگی مزید بڑھ سکتی ہے۔
مصر کی وزارتِ خارجہ کے مطابق اسرائیل کی جانب سے غزہ پر حالیہ فضائی حملے جنگ بندی کی مسلسل خلاف ورزی ہیں۔ قاہرہ نے تمام فریقین سے مطالبہ کیا ہے کہ رفح بارڈر کراسنگ کی طویل انتظار کے بعد بحالی سے قبل جنگ بندی کا احترام کیا جائے۔ اردن کی وزارت خارجہ کے ترجمان فواد مجالی نے فریقین سے جنگ بندی معاہدے اور اس کی دفعات پر سختی سے عمل کرنے پر زور دیا۔ جس میں غزہ کو انسانی امداد کی فوری، مناسب اور بلا روک ٹوک ترسیل کے ساتھ ساتھ معاہدے کے دوسرے مرحلے کے ساتھ آگے بڑھنا بھی شامل ہے
