Raza Musani 
دوحہ: قطر نے ایرانی حملے کی مذمت کرتے ہوئے کہاہے کہ میزائل حملوں کے بعد قطر میں صورتحال قابو میں ہے اور زندگی معمول پر آگئی ہے۔ ترجمان قطری وزارت خارجہ ڈاکٹر ماجد الانصاری نے کہا ہے کہ اس طرح کی اشتعال انگیز عسکری کارروائیوں کا تسلسل خطے کی سلامتی اور استحکام کو شدید خطرے میں ڈال دے گا اور یہ اقدامات عالمی امن و سلامتی کے لیے تباہ کن نتائج کا باعث بن سکتے ہیں۔ ان کا مزید کہنا تھا کہ تمام فریقوں سے مطالبہ کرتے ہیں کہ فوری طور پر تمام عسکری کارروائیاں بند کی جائیں اور سنجیدگی کے ساتھ مذاکرات کی میز پر واپسی اور مکالمے کا راستہ اپنایا جائے۔
ایران پر امریکی حملے کی مذمت سے گریز کرنے والے سعودی عرب۔ مصر۔ عمان اور متحدہ عرب امارات نے قطر پر ایرانی حملے کی شدید مذمت کرتے ہوئے اسے ناقابل قبول قرار دیا ہے۔
سعودی وزارت خارجہ نے کہا کہ ایرانی حملہ بین الاقوامی قوانین اور ہمسائیگی کے اصولوں کی کھلی خلاف ورزی ہے۔
یو اے ای کے وزارت خارجہ نے حملے کو قطر کی خودمختاری اور فضائی حدود کی کھلی خلاف ورزی اور بین الاقوامی قوانین و اقوام متحدہ کے چارٹر کی صریح خلاف ورزی‘ قرار دیا ہے.
