Raza Musani 
کراچی: کراچی میں پاراچنار کی ناکا بندی کیخلاف سولہ مقامات پر دھرنے جاری ہیں۔ انتظامیہ نے ملیر 15 نمبر اور نیشنل ہائی وے ٹاؤن شپ پر احتجاج ختم کراکے ٹریفک بحال کرادیا تاہم شام کو ملیر پندرہ پر دوبارہ احتجاج شروع ہوگیا۔ گذشتہ رات عائشہ منزل پر آئی آر سی امام بارگاہ کے سامنے اور اولڈ رضویہ پر بھی دھرنے شروع ہوگئے۔ سرد موسم کے باوجود دھرنوں میں خواتین، مردوں اور بچوں کی بڑی تعداد شریک ہے۔
نمائش چورنگی کا مرکزی دھرنا ساتویں روز میں داخل ہوگیا ہے۔ کمشنر کراچی حسن نقوی اور ایڈیشنل کراچی جاوید عالم اوڈو نمائش چورنگی دھرنے میں پہنچے اور علامہ حسن ظفر نقوی سے مذاکرات کئے۔ علامہ حسن ظفر نقوی نے واضح کیا کہ جب تک پاراچنار کی سڑک نہیں کھلتی کراچی میں بھی دھرنے جاری رہیں گے۔
ملی یکجہتی کونسل کا وفد بھی نمائش چورنگی دھرنے کے شرکاء سے اظہار یکجہتی کیلئے پہنچا۔ ابو الحسن اصفہانی روڈ عباس ٹاؤن، فائیو اسٹار چورنگی، سرجانی ٹاؤن کے ڈی اے فلیٹس، گلستان جوہر کامران چورنگی، پاور ہاؤس چورنگی، اسٹیل ٹاؤن، صفورہ چورنگی اور کورنگی ڈھائی نمبر پر بھی دھرنے جاری ہیں۔
