فلسطینیوں کو مغربی کنارے میں نسلی تطہیر کے خطرے کا سامنا

غزہ : جنگ اور آفت زدہ علاقوں میں طبی امداد پہنچانے والی بین الاقوامی تنظیم ڈاکٹرز ود آؤٹ بارڈرز ایم ایس ایف نے خبردار کیا ہے کہ فلسطینیوں کو مقبوضہ مغربی کنارے میں نسلی تطہیر کے خطرے کا سامنا ہے۔ ایم ایس ایف نے ایک بیان میں کہا کہ اسرائیلی پالیسیوں کا مقصد مغربی کنارے میں زمین کو ضم کرنا ہے جو بین الاقوامی قانون اور بین الاقوامی انسانی حقوق کے قانون کی سنگین خلاف ورزی ہے۔ اسرائیلی فوج اور آباد کاروں کے حملے ہزاروں افراد کو زبردستی بے گھر کر رہے ہیں۔
ایم ایس ایف نے زور دیا کہ اسرائیلی قبضے کا خاتمہ فلسطینیوں کو درپیش شدید مصائب کو کم کرنے کا واحد راستہ ہے۔ تنظیم نے امریکہ اور یورپی یونین کے رکن ممالک پر زور دیا کہ وہ فلسطینیوں کو نقصان پہنچانے اور بے گھر کرنے والے طریقوں کو روکنے کے لیے اسرائیل پر بامعنی دباؤ ڈالیں اور غیر قانونی قبضے کے خاتمے کو یقینی بنائیں۔