فلسطینی ریاست ہماری عوام کے حقِ ملکیت کی توثیق ہے، حماس

غزہ : حماس نے فلسطینی ریاست تسلیم کرنے کو انصاف کی فتح قرار دیا ہے جبکہ اسرائیلی وزیرِاعظم نیتن یاہو نے کہا ہے کہ کوئی فلسطینی ریاست نہیں بنے گی۔
حماس کے سینئر عہدیدار محمود مرداوی نے کہاکہ یہ اقدام فلسطینیوں کے حقوق کی فتح اور اسرائیل کو واضح پیغام بھیجے گا۔ انہوں نے کہا کہ خودمختار فلسطینی ریاست ہماری عوام کے حقِ ملکیت کی توثیق ہے۔ آزاد فلسطینی ریاست کا دارالحکومت القدس ہوگا۔
اسرائیلی وزیراعظم نیتن یاہو نے کھلی ہٹ دھرمی کا مظاہرہ کرتے ہوئے کہا ہے کہ کوئی فلسطینی ریاست نہیں بنے گی۔ نیتن یاہو نے فلسطینی ریاست تسلیم کرنے کو دہشت گردی کو انعام دینے سے تعبیر کرتے ہوئے کہا کہ فلسطینی ریاست مسلط کرنے کی کوشش کا جواب امریکا سے واپسی پر دیں گے۔ اسرائیلی وزارتِ خارجہ نے دعویٰ کیا ہے کہ فلسطین کو ریاست تسلیم کرنے سے تنازع کے پُرامن حل کے امکانات کو نقصان پہنچے گا۔