فلسطینیوں کا اعتراض، سعودی سفیر کا مسجد اقصیٰ کا دورہ ملتوی

مقبوضہ بیت المقدس: فلسطین کیلئے غیر مقیم سعودی سفیر نے فلسطینیوں کے اعتراض پر مسجد اقصیٰ کا طے شدہ دورہ ملتوی کردیا۔ اسرائیلی اخبار کے مطابق فلسطینیوں نے سوشل میڈیا پر سعودی سفیر نایف السدیری کے مجوزہ دورے پر شدید تنقید کی تھی اور کہا تھا کہ اس دورے کو مشرقی یروشلم پر اسرائیلی قبضے کی توثیق سمجھا جائے گا۔ فلسطینیوں نے سعودی وفد کو مسجد میں داخل ہونے سے روکنے کا مطالبہ کیا۔ اخبار کے مطابق سعودی سفیر نایف السدیری نے معاملے کی حساسیت اور تنقید کو دیکھتے ہوئے دورہ ملتوی کردیا وہ بعد میں مسجد الاقصیٰ کا دورہ کرنے کا ارادہ رکھتے ہیں۔ یہ دورہ اسلامی وقف کے ساتھ بھی مربوط نہیں کیا گیا تھا۔ اس سے پہلے نایف بن بندر السدیری نے بطور سفیر ذمہ داریاں سنبھالی تھیں۔ انہوں نے رام اللہ میں فلسطینی صدر محمود عباس سے ملاقات کی اور اپنی سفارتی اسناد پیش کیں۔ وہ فلسطین میں غیر مقیم سعودی سفارتی نمائندے ہونے کے ساتھ ساتھ القدس الشریف میں مملکت کے قونصل جنرل کے فرائض بھی انجام دیں گے۔