لندن میں فلسطینی سفارت خانے کا افتتاح، اعلیٰ حکام بھی شریک

لندن: لندن میں فلسطینی سفارت خانے کا باضابطہ افتتاح کردیا گیا ہے۔ فلسطینی سفیر حسام زملوط نے کہا کہ یہ سفارت خانہ اس بات کا ثبوت ہے کہ فلسطینی شناخت کو جھٹلایا نہیں جا سکتا ہے۔ فلسطینی سفیر حسام زملوط نے یہاں لندن میں سفارت خانے کی تختی کی نقاب کشائی کرتے ہوئے اس تاریخی اقدام کا اعلان کیا۔
لندن میں موجود فلسطینی مشن ٹو یوکے اب سفارتخانہ ریاست فلسطین کہلائے گا۔ تقریب میں برطانوی اعلیٰ حکام، سفارتی کور کے ارکان اور فلسطینی کمیونٹی کے نمائندے شریک تھے۔ حسام زملوط نے فلسطینی صدر اور عوام کی جانب سے برطانوی حکومت اور عوام کا شکریہ ادا کرتے ہوئے کہا کہ یہ لمحہ ایک صدی پر محیط جدوجہد کا ثمر ہے۔ فلسطینی سفیر کا کہنا ہے کہ لندن میں سفارت خانے کا افتتاح فلسطینی عوام کے ناقابلِ تنسیخ حقِ خودمختار ریاست اور عالمی برابری کی باضابطہ توثیق ہے۔ اس سے ثابت ہوگیا کہ فلسطینیوں کے وجود کو مٹایا جا سکتا ہے اور نہ ہی فلسطینی جانوں کی قدر کم کی جا سکتی ہے۔ فلسطینی سفیر نے واضح کیا کہ فلسطین ایک منصفانہ اور دیرپا امن کے لیے پرعزم ہے۔ یہ امن بین الاقوامی قانون، اسرائیلی قبضے کے خاتمے اور فلسطینی مہاجرین کے حقوق کی تکمیل پر ہی ممکن ہے۔