Raza Musani 
رام اللہ : فلسطینی اتھارٹی نے غزہ کی بحالی اور تعمیر نو کے لیے تین مرحلوں پر مشتمل پانچ سالہ منصوبے کا اعلان کردیا۔ رام اللہ میں ایک پریس کانفرنس کے دوران فلسطینی وزیراعظم محمد مصطفیٰ نے بتایا کہ منصوبے کا مقصد جنگ سے تباہ حال علاقے کو دوبارہ آباد کرنا اور اسے ریاستِ فلسطین کا فعال، مربوط اور ترقی یافتہ حصہ بنانا ہے۔ منصوبے پر سڑسٹھ ارب ڈالر لاگت آئے گی۔
انہوں نے بتایا کہ پہلے مرحلے میں فوری انسانی ہمدردی اور بنیادی ڈھانچے کی ضروریات پوری کی جائیں گی، جو چھ ماہ تک جاری رہے گا اور اس کی لاگت ساڑھے تین ارب ڈالر ہوگی۔ دوسرے مرحلے میں تین سال کے دوران 30 ارب ڈالر کی سرمایہ کاری کی ضرورت ہوگی، جبکہ آخری مرحلہ مکمل تعمیر نو اور طویل مدتی بحالی پر مرکوز ہوگا۔ مصطفی نے کہا کہ بین الاقوامی شراکت داروں کے ساتھ وسائل حاصل کرنے کے لیے بات چیت جاری ہے اور جنگ ختم ہونے کے ایک ماہ بعد مصر میں ایک بڑی کانفرنس منعقد کی جائے گی۔
