Raza Musani 
تہران: ولی امر المسلمین آیت الله العظمی سید علی خامنہ ای سے نائیجریا کی اسلامی تحریک کے قائد آیت اللہ شیخ ابراہیم زکزاکی نے ملاقات کی۔ رہبر انقلاب اسلامی نے اس ملاقات میں فلسطین کے حالات کی طرف اشارہ کرتے ہوئے فرمایا کہ فلسطین اور غزہ عالم اسلام کی طاقت کا مظہر ہیں اور عالم اسلام کو فلسطینی عوام کی مدد کرنی چاہیئے۔ آپ نے تاکید کی کہ فلسطین میں خواتین اور بچوں سمیت بے گناہ لوگوں پر بمباری اور طاقت کے وحشیانہ استعمال سے انسانوں کا دل مجروح ہوا ہے لیکن ان واقعات کا دوسرا رخ بھی ہے جوکہ اسلام کی ناقابل یقین طاقت ہے، اللہ تعالیٰ کے فضل و کرم سے فلسطین میں شروع ہونے والی یہ تحریک مزید آگے بڑھے گی اور فلسطینیوں کی مکمل فتح کا باعث بنے گی۔
انہوں نے کہ عالمی سطح پر سازشوں کے باوجود اسلام کی طاقت میں روز بروز اضافہ ہورہا ہے۔
آیت الله علی خامنہ ای نے فرمایا کہ ایران میں اسلامی نظام ہر گزرتے دن کے ساتھ مزید طاقتور ہورہا ہے اور مستقبل میں اس کی طاقت میں مزید اضافہ ہوگا، آج دنیا کے مختلف خطوں خاص طور سے افریقہ، ایشیا، یورپ اور شمالی امریکہ میں اسلامی تحریکیں زور پکڑ رہی ہیں اور اللہ کے فضل سے کامیابی سے ہمکنار ہوں گی۔ رہبر انقلاب اسلامی آیت الله العظمی سید علی خامنہ ای نے اس ملاقات کے دوران فرمایا کہ نائیجیریا کی اسلامی تحریک کے رہنما شیخ ابراہیم زکزاکی اور ان کی شریک حیات کی قربانیاں قابل قدر ہیں۔ رہبر انقلاب نے شیخ زکزاکی سے ملاقات پر خوشی کا اظہار کرتے ہوئے کہا کہ آپ اللہ کی راہ میں حقیقی معنوں میں جہاد کررہے ہیں اور امید ہے کہ اس کو مزید جاری رکھیں گے۔ شیخ ابراہیم زکزاکی اور ان کی اہلیہ نے رہبر انقلاب اسلامی آیت الله العظمی سید علی خامنه ای سے ملاقات پر انتہائی خوشی کا اظہار کرتے ہوئے کہا کہ اس وقت ان کے جذبات ناقابل بیان ہیں۔ انہوں نے کہا کہ رہبر معظم کی دعاؤں اور مسلمانوں کی کوششوں کی بدولت اسلام مزید ترقی کرے گا۔
