Raza Musani 
کابل: پاکستان۔ افغانستان اور چین نے سی پیک کو افغانستان تک توسیع دینے پر اتفاق کیا ہے۔ افغانستان کے دارالحکومت کابل میں پاکستان، چین اور افغانستان وزرائے خارجہ کے درمیان چھٹا سہ فریقی اجلاس ہوا۔ پاکستانی دفتر خارجہ کے مطابق سہ فریقی اجلاس میں سیاسی، اقتصادی اور سیکیورٹی تعاون پر بات چیت ہوئی۔ اور تینوں ممالک نے دہشت گردی کے خلاف مشترکہ کوششیں تیز کرنے کا عزم کیا۔
ترجمان نے بتایا کہ سہ فریقی اجلاس میں تجارت، ٹرانزٹ، علاقائی ترقی، صحت، تعلیم و ثقافتی تعاون بڑھانے اور سی پیک کو افغانستان تک توسیع دینے پر اتفاق کیا گیا۔
اس سے پہلے پاکستانی وزیر خارجہ اسحاق ڈار نے افغان وزیر خارجہ امیر خان متقی سے ملاقات میں دہشت گردی کے خلاف تعاون میں سست روی پر اظہارِ تشویش کیا اور افغان سرزمین سے حملوں پر مؤثر کارروائی کا مطالبہ کیا۔ ترجمان کے مطابق افغان وزیر خارجہ نے یقین دلایا کہ افغان سرزمین کسی ملک کے خلاف استعمال نہیں ہونے دی جائے گی۔
