ٹیلی ویژن نہیں صرف ریڈیو چلے گا، طالبان کا نیا حکم

کابل : افغان طالبان نے آزادیوں کو مزید محدود کرتے ہوئے ٹیلی ویژن کی نشریات بند کرنے کا حکم دے دیا۔ افغانستان میں نیشنل ریڈیو اور ٹیلی ویژن کے ڈائریکٹر جنرل قاری یوسف احمدی نے ٹیلی ویژن اور ریڈیو کی شاخوں کے سربراہوں سے ملاقات کی اور انہیں بتایا کہ طالبان سپریم لیڈر ملا ھبۃ اللہ اخوند زادہ نے ان پر دباؤ ڈالا ہے کہ وہ ٹیلی ویژن چینلز کی نشریات بند کردیں کیونکہ وہ جانداروں کی تصویر کشی کرتے ہیں۔ انہوں نے کہا کہ ٹیلی ویژن چینلز کی نشریات بند کردی جائیں گی اورانہیں ریڈیو اسٹیشنوں میں تبدیل کر دیا جائے گا۔ سرکاری ٹیلی ویژن نے نو ریاستوں میں نشریات بند کردی ہیں اور اپنی نشریات کو آڈیو نشریات میں تبدیل کر دیا ہے۔ اگرچہ ابھی تک یہ معلوم نہیں ہوسکا ہے کہ آیا اس فیصلے سے تمام چینلز متاثر ہوں گے یا نہیں۔ حکومتی وزیروں میں سے ایک نے گزشتہ ہفتے کہا تھا کہ یہ فیصلہ صرف سرکاری چینلز تک محدود رہے گا۔