ابوبکر البغدادی کی ایک اہلیہ کو موت جبکہ تیسری بیوی اور بیٹی کو عمر قید کی سزا

بغداد: عراق کی ایک عدالت نے دہشت گرد تنظیم داعش کے سرغنہ ابوبکر البغدادی کی اہلیہ اسما محمد کو موت جبکہ تیسری بیوی اور بیٹی کو عمر قید کی سزا سنا دی۔ یہ سزائیں عراق علاقے کرخ کی ایک فوجداری عدالت نے 2005 کے انسداد دہشت گردی قانون کے تحت سنائیں۔ اسما محمد کو داعش کے لیے کام کرنے اور یزیدی خواتین کو اپنے گھر میں یرغمال بنانے کے جرم میں سزائے موت سنائی گئی۔ عدالت کے 4 ججز میں سے ایک نے فیصلے کی مخالفت کی۔
ابوبکر البغدادی کی تیسری بیوی نور الزوبعی اور ایک بیٹی کو عمیمہ کو عمر قید کی سزا سنائی گئی ہے۔ خیال رہے کہ 16 فروری 2024 کو عراقی نیشنل انٹیلی جنس سروس نے ابوبکر البغدادی کی اہلیہ اور بیٹی کو حراست میں لیا تھا۔ ابوبکر بغدادی کی اہلیہ اسما پر نوجوان لڑکیوں کو بھرتی کر کے اپنے شوہر البغدادی کے حوالے کرنے کا الزام بھی تھا اور مبینہ طور پر یزیدی لڑکیوں کو جنسی استحصال کے لیے بھی گھر میں رکھا۔ البغدادی کی اہلیہ نے ان الزامات کو جھوٹا قرار دیا تھا تاہم مغوی یزیدی لڑکیوں نے اسے عدالت میں شناخت کرلیا تھا۔