Raza Musani 
جدہ : اسلامی تعاون تنظیم نے ہنگامی ورچوئل اجلاس میں توہین قرآن کے واقعات پر سویڈن اور ڈنمارک کے ردعمل کو مایوس کن قرار دیا ہے اور مطالبہ کیا کہ قرآن مجید کی بے حرمتی کو روکا جائے۔ سویڈن اور ڈنمارک میں قرآن پاک کی بار بار بے حرمتی کے واقعات پر اسلامی تعاون تنظیم کے رکن ممالک کے وزرائے خارجہ کا غیر معمولی ورچوئل اجلاس جدہ میں ہوا۔ اجلاس کے بعد جاری اعلامیہ میں کہا گیا ہے کہ سویڈن اور ڈنمارک میں تواتر سے توہین قرآن کے باوجود روک تھام کا کوئی اقدام نہ ہونا افسوسناک ہے۔ دونوں ممالک کے حکام ان واقعات سے نظریں چرانا عالمی امن اور صلح کے بارے میں اقوام متحدہ کی قرار دادوں کی خلاف ورزی ہے۔ او آئی سی کے سیکریٹری جنرل حسین طہ نے کہا کہ قرآن پاک کو نذر آتش کرنے اور بے حرمتی کے واقعات کو روکنے کے لیے سرکار اقدامات کریں۔ سعودی وزیر خارجہ نے کہا کہ مختلف اسلامی تنظیموں کے ساتھ تعاون اور یکجہتی سے او آئی سی کو اس حوالے سے بڑا کردارادا کرنا ہوگا۔ ادھر سویڈن میں ایک بار پھر پارلیمنٹ کے سامنے قران جلا دیا گیا۔ ملعون سلوان مومیکا نے دھمکی دی ہے کہ پابندی لگنے تک سویڈن میں قرآن جلاتے رہیں گے.
