غاصب اسرائیل کا غزہ میں ممنوع فاسفورس بموں کا استعمال، شہادتیں 900 سے تجاوز، 260 بچے شامل

غزہ: صیہونی فوج نے غزہ میں ممنوعہ سفید فاسفورس بم کا استعمال بھی شروع کردیا۔ صیہونی فوج نے غزہ میں سفید فاسفورس کے بم پھینکے ہیں جس کی تصدیق مقامی افراد نے کی ہے اور بتایا کہ بعض علاقوں میں فاسفورس کی بو پھیلی ہوئی ہے۔ ادھر صیہونی فوج نے پانچویں دن بھی غزہ پر وحشیانہ حملوں کا سلسلہ جاری رکھا۔ رات بھر بمباری سے مزید 30 افراد شہید ہوگئے۔ شہدا کی مجموعی تعداد 900 سے تجاوز کرگئی جس میں 260 بچے شامل ہیں۔ حملوں میں متعدد عمارتوں کو نقصان پہنچا۔ صیہونی فوج نے رہائشی عمارتوں، مساجد، دکانوں اور فیکٹریوں کو نشانہ بنایا۔ آج صبح حماس کے 80 ٹھکانوں کو نشانہ بنانے کا دعویٰ کیا گیا ہے۔ علاوہ ازیں اقوام متحدہ کے ادارے کا کہنا ہےکہ 1 لاکھ 87 ہزار سے زائد فلسطینی گھر چھوڑنے پر مجبور ہو کر اسکولوں میں پناہ لیے ہوئے ہیں۔ گذشتہ روز حماس نے وارننگ کے بعد مقبوضہ اسرائیلی شہر عسقلان پر درجنوں راکٹ داغ دئے۔ جس سے دو افراد ہلاک۔ کئی زخمی ہوگئے۔ اسرائیلیوں کی مجموعی ہلاکتیں 12 سو اور زخمی تین ہزار تک جاپہنچے۔ مرنیوالوں میں 170 فوجی شامل ہیں۔ غزہ کے علاقے خان یونس میں اسرائیلی بمباری کے جواب میں القسام بریگیڈ نے زمین سے فضا میں مار کرنے والے میزائل کا استعمال کیا ہے۔ القسام بریگیڈ کے مطابق اسرائیلی طیاروں پر 2 میزائل داغے ہیں۔