نیتن یاہو کا بیان جرائم سے بری ہونے کی مایوس کن کوشش ہے، حماس

غزہ : حماس نے ایک بیان میں کہا ہے کہ نیتن یاہو کا بیان صیہونی وجود اور اس کی فوج کو نسل کشی اور فاقہ کشی کے جرائم سے بری کرنے کی مایوس کن کوشش ہے۔ حماس نے کہا کہ نیتن یاہو کی جانب سے آزادی کی اصطلاح کا استعمال بین الاقوامی قانون کے تحت قبضے کی قانونی حقیقت کو مسخ کرنے کی کوشش ہے۔ حماس کے بیان میں کہاگیاہے کہ نیتن یاہو کا غزہ پر قبضہ نہ کرنے کا بیان محض دھوکا ہے۔ جس کا مقصد جبری نقل مکانی، ضروری انفراسٹرکچر کی تباہی اور پراکسی اتھارٹی کو مسلط کرنے کے منصوبوں کو چھپانا ہے۔ حماس نے کہا کہ نیتن یاہو اسرائیلی اسیران کو مسلسل جارحیت کے بہانے کے طور پر استعمال کررہا ہے اور اپنی فوج کے درجنوں اسیروں کو ہلاک کرنے میں کردار اور جنوری کے جنگ بندی معاہدے کی خلاف ورزی کو نظر انداز کررہا ہے۔