پاراچنار کیلئے ملک بھر میں احتجاجی دھرنے، کراچی میں مزید مقامات پر دھرنے

کراچی : پاراچنارکے مظلوم عوام سے یکجہتی کیلئے ملک بھر میں احتجاجی دھرنے جاری ہیں۔ کراچی می نمائش چورنگی اور عباس ٹاؤن کے بعد شہر کے سات مزید مقامات پر دھرنوں کا سلسلہ شروع ہوگیا ہے۔ ملیر پندرہ، شاہراہ فیصل، شاہ فیصل کالونی، اور فائیو اسٹار چورنگی پر بھی مظاہرین نے دھرنے دئے۔ یونیورسٹی روڈ پر سمامہ شاپنگ سینٹر کے قریب بھی دھرنا دیا گیا۔ دھرنوں کی وجہ سے ٹریفک متاثر ہوا ٹریفک پولیس کی جانب سے شہریوں کو متبادل راستہ اپنانے کی ہدایت کی جاتی رہی۔
مجلس وحدت مسلمین کا نمائش چورنگی پر آج چوتھے روز بھی مرکزی دھرنا جاری ہے۔ مختلف تنظیموں، علماء کرام، شخصیات و اکابرین نے دھرنے میں شرکت کی اور شرکاء سے اظہار یکجہتی کیا ۔دھرنے میں علامہ حسن ظفر نقوی، علامہ صادق تقوی ، علامہ مختار امامی، علامہ رضا جعفری، مولانا علی مرتضیٰ زیدی، نوحہ خواں میر حسن میر ، شاہد بلتستانی ، مسلم مہدوی سمیت دیگر نے خطاب اور نذرانہ عقیدت پیش کیا۔
احتجاجی دھرنے سے خطاب میں ایم ڈبلیو ایم کے مرکزی رہنما علامہ حسن ظفر نقوی کا کہنا تھا کہ شدید سردی میں خواتین، بچوں، بزرگوں کے ہمراہ احتجاج جاری ہے۔انہون نے کہا کہ ہمارا احتجاج پر امن ہے ماضی میں بھی ہزارہ برادری پر ظلم کے خلاف ملک گیر احتجاج کیا تھا جس میں کسی قومی املاک کو نقصان نہیں پہچایا گیا۔ہزارہ ٹاؤن ہو یا پاراچنار ،گلگت و بلتستان ہو یا کراچی سانحہ حیدری مسجد، امام بارگاہ علی رضا ،نشرپارک، عاشورا و اربعین، آرمی پبلک اسکول ملک بھر میں دہشت گردوں کا چہرہ واضح ہے۔ انہوں نے کہا کہ وطن میں انصاف کے حصول کیلئے جب تک احتجاج کرنا پڑا کریں گے۔ ملک کو سب سے زیادہ نقصان انتہا پسندی اور نا اہل سیاستدانوں نے پہنچایا۔ دہشت گردی کے عفریت نے ملک کے امن کو تباہ کر کے رکھ دیا ہے۔
انہوں نے کہا کہ آج پاراچنار سمیت ملک کے بیشتر حصے اندرونی و بیرونی دشمنوں کے زیر اثر ہیں۔ ملک میں آخری دہشت گرد کے خاتمے تک احتجاج کرتے رہیں گے۔