Raza Musani 
ملتان: مجلس وحدت مسلمین پاکستان کے چیئرمین علامہ راجہ ناصر عباس جعفری کی اپیل پر سانحہ تری منگل کے خلاف ملک بھر میں یوم احتجاج منایا گیا، اسلام آباد، کراچی، لاہور، پشاور، کوئٹہ، آزاد کشمیر، گلگت بلتستان، بہاولپور، ڈیرہ غازی خان، ملتان سمیت دیگر شہروں میں نماز جمعہ کے بعد احتجاجی ریلیاں اور مظاہرے کیے گئے، ملتان میں مجلس وحدت مسلمین اور امامیہ اسٹوڈنٹس آرگنائزیشن کے زیراہتمام نماز جمعہ کے بعد امام بارگاہ ابو الفضل العباس سے چوک کمہاراں تک ریلی نکالی گئی۔ ریلی کی قیادت مجلس وحدت مسلمین کے رہنماؤں علامہ اقتدار نقوی، علامہ قاضی نادر علوی، علامہ وسیم معصومی، سلیم عباس صدیقی، انجینئر سخاوت علی، امامیہ اسٹوڈنٹس آرگنائزیشن ملتان کے ڈویژنل جنرل سیکریٹری مشتاق مہدی نے کی۔ رہنماؤں نے کرم ایجنسی کے نواحی علاقے تری منگل میں شیعہ اساتذہ سمیت 7 افراد کے بہیمانہ قتل کی پرزور مذمت کرتے ہوئے واقعے کی تحقیقات کرکے قاتلوں کو فوری گرفتاری کا مطالبہ کیا۔انہوں نے کہا کہ پاراچنار میں دہشت گردی کے واقعے کی پرزور مذمت کرتے ہیں، پاراچنار میں یہ دہشت گردی کا پہلا واقعہ نہیں، بے گناہ اساتذہ کا اسکول میں بہیمانہ قتل قومی نقصان ہے حکومت نے عوام کو مہنگائی، بے روزگاری اور بیرونی غلامی کے بعد دہشت گردوں کے رحم وکرم پر چھوڑ دیا ہے، ایک بار پھر سے ملک دشمن قوتیں پرامن پارا چنار کا امن سبوتاژ کرنے کے درپے ہیں، انہوں نے کہا کہ پاراچنار کے مقامی عوام نے ہمیشہ سبز ہلالی پرچم کی عظمت کے گن گائے ہیں، وہ وطن عزیز کا مضبوط جغرافیائی و نظریاتی دفاع ہیں، ان کے ساتھ سوتیلی ماں جیسا سلوک نہ کیا جائے، پارا چنار جیسے حساس علاقے میں دہشت گردی کے واقعات کا رونما ہونا قومی سلامتی کے اداروں کے لیے بھی چیلنج ہے۔ رہنمائوں نے مطالبہ کیا کہ وفاقی حکومت اور آرمی چیف کرم ایجنسی پاراچنار میں دہشتگردانہ کاروائی کا فوری نوٹس لیں، واقعہ میں ملوث دہشتگردوں کو سخت سزا دی جائے، انہوں نے کہا کہ واقع میں شہید ہونے والے اساتذہ کے لواحقین کے غم میں برابر کے شریک ہیں اور زخمیوں کی جلد صحت یابی کیلئے دعاگو ہیں۔
